مجلس محلى بسيون …صحوا النوم يا افنديه

الجماعة الحلوين بتوع المجالس المحلية عليهم هم تقيل و يا الف حسرة عليهم ……و الله صعبانين على الواحد …. 99ز9% من اهل بسيون ما يعرفوش السادة الاعضاء … طبعا لان ما حدش انتخبهم اساسا .

المهم كلامنا النهارده موجه للسادة اعضاء المجلس المحلى

الحديقة اللى قدام حاكم المدينة اللى تحت الانشاء نجلوها نجيله نص كم و طبعا ما فيش متابعه … خايف تنشف و تموت و يا جماعة النجيله غالية و مصاريفها بنظام خروف نجيب الريحانى … كمان منظرها وحش جدا عاليه و عامله زى الهرم يعنى اللى ماشى مش هيشوف حاجه و لا اللى راكب ، و لا دى علشان رئيس المجلس هو اللى يشوف الخضرة من الشباك ، و لا علشان الناس تتفسح فيها بدل ما احنا بنشم ريحة المصرف ، مش عارف يا اعضاء المجلس انتم  مهمتكم ايه.

تانى حاجه شوارع البلد اللى عامله زى رالى الفراعنه دى هتفضل كده لحد امتى انتم ناويين تبلطوها على حسابكم و بتحوشوا و لا ايه

تالت حاجه صحيح يا بهوات انتم بتشربوا الميه من الجنفيه او على الاقل بتغسلوا وشكم الجيل منها ، بالله عليكم الميه لونها طين لا تغسل و لا ينفع ينشرب منها ، الفشل الكلوى فى ارتفاع ، ربنا يكفيكم شر الفشل الكلوى و السرطان شوفوا لنا حل

انا عارف ان انتم ودن طين وودن عجين و عمركم ما هتعملوا حاجه انتم حاجة ديكور

بس اهو اعذار لنفسى قدام ربنا و يمكن ……………..يمكن اطلع غلطان و تكونوا رجاله

العبث و الفوضى فى شوارع بسيون … اين رجال الشرطة؟

ليس من الغريب ابدا ان كنت من خارج بسيون و رأيت مهازل تملأ شوارع المدينة ، الدراجات البخارية يقودها اطفال و بسرعة جنونية  ، شباب يتسكعون على النواصى و الطرقات ، ترى مجموعات البلطجية و المسجلين جنائيا يمرحون فى الشوارع بلاضابط و لا رابط و هم معروفون لدى افراد الشرطة جميعا و لهم انشطتهم التى لا تخفى على احد ، تراهم يسحبون الكلاب الشرسة و يعبثون فى الشوارع و تسمع اصواتهم المزعجة و تسمع اقزع الشتائم يتداولونها فيما بينهم ، ترى من ناحية اخرى شباب صغار يقودون سياراتهم بسرعة جنونية و الاضواء المتعبة و مصابيح الزينون المخالفة لقوانين المرور .

و لكن اين رجال الشرطة البواسل ؟ لا نراهم الا يدورون فى الشوارع و على المقاهى يمارسون تفتيش الجالسين عليها و معروف انهم غير من ذوى السوابق و الاجرام بل من الحرفيين او الشباب الذى لا يجد عمل او المتعطلين من الصنايعية الغلابة و لا عيب فى سحبهم اذا كان معهم او لم يكن معهم البطاقة الشخصية و محضر برشام او مطواه قرن غزال او محضر بجرامين بانجو ، يعنى شغل تسديد خانات ، علشان حررنا كذا محضر و عملنا كام قضية سرقة على كام قضية اداب عامة مع انهم عارفين الساقطات و عارفين اوكارهم……..لكن حكم……هات عيلين و اعملهم قضية معاكسة فى الطريق العام او اداب عامة (تحرش فى طابور العيش و لا يوم السوق) مع ان اكتر العيال اللى بتتمسك فى السوق بتبقى عابرى طريق و برغم كده السوق مليان عيال من اياها .

مش عارف امتى الشرطه تاخد دورها الطبيعى و اعتبر دا بلاغ علنى للشرطة

!- السوابق و المسجلين واخدين الشوارع بالعرض و بالطول

2- الموتسيكلات اللى من غير نمر و بيركبها عيال على عينك يا تاجر

3-تجار المخدرات …. انتم عارفينهم …… ريحونا منهم

4-بطلوا تلموا فى الغلابة اللى انت عارفين انهم ما لهمش فى العمى

و سلام على بسيون